السلام عليكم
البهيم إكتشف أنو إسمو لما يقولوه بنو البشر لبعضهم يتنرفزوا وبالتالي فهم أنو لازم يبدّل أسمو ..هز روحو ومشلى للحاكم متاع الغابة ، المحكمة منصوبة ، قال : سيدي الحاكم ، أنا اليوم إكتشفت أنو إسمي يعتبروه البشر سُبّة ، لذا جيت باش نغيرو نهائيا ، تبسم الأسد وقالّوا " أيا باهي ،، وآش قررت باش يولي إسمك؟ جاوبو : حوتة سيدي الرئيس..قال الأسد: حوتة ؟؟؟ لكن هاو موجودة في البحر والوديان ؟؟ بالكشي تتغشش ؟ قال البهيم : وتتغشش علاش؟؟ هي نعتبروها حوتة البحر وأنا حوتة البر ..ولى الأسد استشار أعضادو النمر والفيل ومنها قالو : داكوردو، قررنا من اللحظة هذي يتغير إسمك وتولي حوتة ..وسلمو الحُكم ..خرج البهيم فرحان ، عارضو ذئب، سلم عليه وقالو : نشوف فيك فرحان يا باهاما ..(تربيجة وبرّه ) قالو: لا باهاما ولا بهّوم ، شد إقرأ الحكم ، انا من اليوم اسمي حوتة ..وبالله خبّر الذيوبة والكلاب والثعالب ، داكوردو ؟؟ عارضتو بقرة : كيف كيف خبرها وطلب منها تعلم جماعة القرون الكل، لين تقابل مع قرد، ودار بيناتهم الحوار التالي:
القرد: اهلا بهيم
البهيم : حسّن ملافظك ، اوكي؟؟( عندو تكوين في الانقايزية )
القرد: علاه؟؟ موش انت بهيم ؟
البهيم: يا حسرة عليك،،، انا بمقتضى حكم صادر عن المحكمة وليت إسمىي حوتة ..
القرد: حوتة ؟؟ ملاّ حوتة ؟؟ باهي ياسر ...تعرفشي تعوم على الأقل ؟؟
البهيم : لا ، خوك كعبة لا في السباحة
القرد: مالا هاك بهيم ............
***************
فمة واحد كذّاب ، طفّوه أصحابو ، عاد ولّى يجمع في وليدات صغار يدوّرهم بيه ويبدأ يجلز عليهم ( الفعل جلّز معناه قال كذب مفلق ، تتكسر الدبّوزة ويقعد الزيت معلّق) هاو نهار وهوما دايرين بيه قاللهم : أنا راني صياد غزال من الطراز الرفيع ، كيف نمشي لعين دراهم ، الغزالة الي وزنها أقل من مئة كيلو ما نخزرلهاش حتى الخزران..هاو مرة تعدت قدّامي غزالة (هاك الي قرونها بالأغصان) قال أنا عمّرت المقرون وصوّبت وهي تعمل هكة وتفصع ، هي تجري وأنا نجري، قال: وقفت ترتاح في "الجم" أنا صوّبت وهي تعمل هكة وتفصع ...أيا ما نطولش عليكم ، شديتها في جربة ...
قالولوا: والبحر ؟؟؟
قال: هاو علاش نكره الحديث مع الفروووووووووخ ......
***************************************
واحد ع الأوتوروت يبيع في أرنب ..وطبعا ما وقفتلو حتى سيارة ..هاو كرهبة مولاها مش مزروب وقفلو ...وقال: بقدّاش ها البهيم ؟
رجعلو : حل عينيك ، هذا أرنب موش بهيم ...
السائق: ما نحكيش معاك ، نحكي مع الأرنب ..
******************************
سيدة في الخامسة والستّين تسوق في سيارتها على الطريق السيّار بسرعة فاقت الحد القانوني المسموح بيه ، ( نقولوا أحنا تجري في 130) هاو "رادار "منصوب على هاك الطريق ، وقّفها عون أمن ..ودار بينهما الحوار التّالي:
العون : إحتراماتي سيدي ،من فضلك أوراقك وأوراق السيارة
السيدة : تفضّل، انّجم نعرف علاش؟
العون: شدّك الرادار تجري في سرعة 131كم/س
السيدة: أممم..ما فقتش بالعدّاد،،،وكنت مزروبة،، بنتي في الكلينيك باش تولد ..
العون: ربي يخلّص وحلها لكن القانون قانون..
السيدة: إندرى وين نشبّه عليك،،،استنّى..أنت مش "مُراد" إيه مراد تلميذي...
العون(مستغربا): أنا مراد ، فين تعرفني؟
السيدة: فين نعرفك؟؟نسيت آنستي درّة ؟؟ يا مراد ؟؟يا وليدي
العون: إينعم،، آش أحوالك معلمتي؟؟ تبدّلت عليّ برشة ..إيه كانت أيامات ..
السيدة: مالا باش تجبر بخاطر معلمتك ..وماكش باش تخطّيني..موش هكة؟؟
العون: نخطيك؟؟ لالالالالالا وهذي تجي؟؟؟ أما هاوكة باش "نبدّلوا الطرز" في عوض باش نعملّك محضر ، نطلب منّك باش تهبط من كرهبتك وتجبد ورقة "مضاعفة" وتكتبلي فيها 200 مرّة الجملة التالية : {عليّ أن لا أتجاوز الحد القانوني للسرعة **
***************************
قالك فمة واحد يمشي ساعة ساعة لمطعم ، يطلب كل أنواع السلايط وكل أنواع المشويات وكل أنواع الغلال (معناها فاتورتو هي بيدها ) وقبل الدفع ، يقول للنادل : بربي جيبلي "كأس إسانس" يجيبهولو ، صحيبنا يحطّو في فمو (يشربو) ويزيد فيه ، يخلطوا عليه خدامة المطعم ، شيء ما ينجموش يشدّوه..صاحبنا يغيب شهرين ويرجع (يكونوا هوما نساووه) ويعاود نفس الحكاية ..نهار صاحب المطعم عمل إجتماع طارئ بخدامتو وقاللهم : لازم تردّوا بالكم وكيف يجي أعطوه كل الي يطلبوا وحتى "كاس البنزين" و من بعد سكروا كل شبابيك المطعم وأبوابو وعيّطولي..كيف جاء صحيبنا عطاووه الي طلب وحتى "الكاس" وأحكموا غلق المنافذ وبدأ يدور في وسط المطعم ما بيم الطاولات وصاحب المطعم وخدامتو واقفين يستناوا فيه وقالولو: قدّاش باش يمشيك ها الكأس تو يوفى وتحصل ونفاهموا....
الجمعة نوفمبر 06, 2009 1:49 pm
